28/10嘅可樂箱環保木櫈工作坊已經順利完成! 多謝「升級再造青年木工班」嘅畢業生悉心指導參加者利用回收木材，結合長春社回收番嚟嘅可樂箱，再造成為既實用又有意義嘅可樂箱環保木櫈。大家嚟到賽馬會長春社綠滿林廊 Green Hub 呢個嶄新嘅綠色教育同消閒熱點，參觀到有啲攰嘅時候，不妨坐喺環保木櫈度休息吓!
木工基礎兼進階班 Class E 嘅同學為 Christian Action 基督教勵行會嘅服務使用者製作嘅魯班鎖，已經喺10月頭嘅時候由我哋企劃同事代表捐贈予基督教勵行會。
木工基礎及進階班 Class B同學為CFSC基督教家庭服務中心製作咗實用而精美嘅收納盒，將會送贈到有需要嘅護老者手上。較早前呢批收納盒已由我哋企劃嘅同事代表捐贈，所有收納盒都係由 Y18 Elegant Spirits Ltd 捐贈嘅紅酒木箱升級再造而成㗎，希望收到嘅護老者會鍾意。
24/9嘅回收木製風力車工作坊已經順利完成! 多謝環保爸爸的設計生活Norman 嘅悉心指導，令各位參加嘅小朋友，喺家長嘅協助下，利用回收木，結合飲完嘅紙包飲品去創作出具個人特色、獨一無二嘅風力車。最後大家仲分成兩組，用親手製作嘅風力車嚟咗一場競速比賽，大家都好投入，鬥得難分難解啊!
9月底嘅時候我哋企劃嘅中小學校園願木計劃去到嶺南中學為中二全級嘅同學舉辦DIY回收木設計工作坊 。同學運用佢哋無窮嘅創意同想像力，將回收木條再造成為富個人特色嘅手機座或坐枱燈座。同學仔仲發揮班級團隊精神，將每位同學仔自己設計的回收木條，拼砌成一個相架，用嚟放置佢哋嘅班相，真係別具心思! 老師喺眾多作品之中，挑選咗幾件極具心思嘅作品，嚟緊會喺我哋企劃嘅年度展覽展出，大家記住留意啦！
© 2024 賽馬會樹木再造青年共創計劃 All Rights Reserved.
Web Design By East Technologies
