木工基礎及進階班 Class C及F 嘅同學為明愛元朗鄉郊社區發展計劃度身設計及製作嘅小組作品 – 儲物櫃同農作物苗架已經完成啦，12月嘅時候由我哋企劃嘅同事代表捐贈。
2023年「樹木再造」年度展設計師 — Mani & Yin 上回講到為咗呼應展覽主題「人樹共融」，Mani同Yin係設計中融入樹木作為主要嘅元素。其實唔單止咁㗎，佢哋喺用料選材上都花盡心思，以環保為大原則，貫徹宣揚環保、可持續發展嘅初心。 整個展區用上咗好多唔同嘅環保、循環再用嘅物料，Yin就特別向我哋介紹佢哋嘅得意之作 — 中小學校園「願・木」計劃展區。呢個展區最特別之處係，整組展櫃係由約30個回收紅酒木箱堆砌而成，用來展示「願・木」計劃參與學校嘅學生所DIY嘅回收木作品。 2位設計師天馬行空嘅創作力，諗到令紅酒木箱搖身一變成為展櫃，同中小學生嘅創意思維不謀而合，令呢個展區變得更獨一無二。 除咗紅酒木箱，原來搬運常用嘅卡板都可以循環再用為展板！Mani就話佢最難忘嘅就係「升級再造青年木工班」展區，利用卡板疊高成展示台，展示木工班學員嘅作品，例如多功能百寶箱、入榫小木櫈、回收酒箱木製收納盒等，令參觀者可以近距離接觸到呢啲木作品，更容易認識到升級再造呢個概念。 （待續）
木工基礎兼進階班 Class F 嘅同學為 麥當勞叔叔之家慈善基金 Ronald McDonald House Charities 觀塘家舍嘅暫住病童製作嘅紙巾盒已經完成啦，仲喺12月嘅時候由我哋企劃同事代表捐贈。
2023年「樹木再造」年度展設計師 — Mani & Yin 2023年「樹木再造」年度展已經圓滿結束，今次展覽以「人樹共融」為主題 ，喺賽馬會 – 長春社綠滿林廊及銅鑼灣時代廣場進行為期約8星期嘅巡迴展覽，希望參觀者都可以對本地樹木、升級再造及可持續發展概念有更多認識。充滿著自然氛圍嘅木造空間令參觀者可以享受片刻嘅放鬆和平靜。大家係唔係好奇背後嘅展覽設計師係邊位呢？ 大家勢必估唔到今次展覽設計係出自2位年紀輕輕嘅香港知專設計學院學生嘅手筆，分別係就讀21-23屆傢俱及時尚產品設計高級文憑課程嘅張敏莉(Mani)同馮芷彥(Yin)。喺前期設計構思上，2位都花咗唔少心思。Yin表示希望透過加入與樹木形態相關嘅元素，呼應展覽「人樹共融」嘅主題，讓參觀者步入展覽當刻就立即聯想起樹木，真切感受到樹木同設計工藝融合所產生嘅火花，同樹木嚟一場獨特而難忘嘅交流。Mani補充道：「除此之外，我哋將展區劃分為『本地樹木』、『轉化再造』、『社會共創』三大展區，參觀者可以由淺入深咁去了解人與樹木之間嘅聯繫同咩係升級再造，希望傳達『將本地樹木變成社會珍寶』嘅訊息予公眾」。 （待續）
木工基礎及進階班 Class C & F 嘅同學特別為香港路德會社會服務處 HKLSS 服務嘅基層家庭製作嘅實用多功能百寶箱、入榫收納凳及回收酒箱木製收納盒 已經完成啦，12月嘅時候仲由我哋企劃同事代表捐贈予香港路德會社會服務處。
© 2025 賽馬會樹木再造青年共創計劃 All Rights Reserved.
Web Design By East Technologies
