9月底嘅時候我哋企劃嘅中小學校園願木計劃去到嶺南中學為中二全級嘅同學舉辦DIY回收木設計工作坊 。同學運用佢哋無窮嘅創意同想像力，將回收木條再造成為富個人特色嘅手機座或坐枱燈座。同學仔仲發揮班級團隊精神，將每位同學仔自己設計的回收木條，拼砌成一個相架，用嚟放置佢哋嘅班相，真係別具心思! 老師喺眾多作品之中，挑選咗幾件極具心思嘅作品，嚟緊會喺我哋企劃嘅年度展覽展出，大家記住留意啦！
24/9 嘅回收木製迴力船工作坊已經順利完成! 多謝環保爸爸的設計生活嘅Norman教各位小朋友利用回收木去創作出世界上獨一無二、極具個人特色嘅迴力船，而家長從旁協助。當小朋友測試到自己嘅船仔可以成功喺水上行走時，都超興奮啊! Norman仲分享咗唔少佢自己設計嘅環保小玩意，小朋友即場試玩咗回收木製弓箭、雪條棍手槍、紅酒木箱製乒乓球拍等，除咗係一個好好嘅親子活動，大人同小朋友玩得開心之餘，小朋友仲學識點樣將環保同升級再造融入生活當中，真係好有意義。
木工基礎及進階班 Class A & D 嘅同學特別為香港基督教服務處嘅基層家庭及學童製作嘅百寶箱已經完成。9月中嘅時候由我哋企劃嘅同事代表捐贈，學童們收到都好開心。驟眼睇，百寶箱好似一個普普通通嘅手提箱，但其實內有乾坤！ 1) 內有卡槽設計，可放置手提電腦、平板電腦、手機、書本、文具等 2) 收納空間充足，更提供活動式隔板，收納更具彈性 3) 又係多用途工作枱，可化身為手提電腦枱、書枱或餐枱 4) 附設磁吸式LED燈，簡單拆下就可以用USB充電，可調節色溫亮度，仲設有時鐘功能，一應俱全 5) 附有折疊式枱腳，方便收納存放 百寶箱箱仔細細，但用途多多，可因應同學仔不同嘅需要而變身，無論係當枱用定用嚟收納書本都絕對無難度！
木工班Class F開課啦！由木碎好少年Chipgoodguy Studio創辦人之一Dave Ho Lok Chung擔任導師，第一堂大家都好留心聽書，同學仔仲初次體驗劃線同用木鋸。大家都咁專注，好期待佢哋之後製作出嚟嘅魯班鎖、紙巾盒、手機座同收納櫈啊！
木工班Class C已經正式開課啦 ! 由Faculty of Craft手作館嘅導師李Sir主理，課程由淺入深，同學將會學習木工嘅不同技巧，仲會親身製作全入榫木凳、收納盒、廁紙盒及百寶箱，所有完成嘅木製品都會捐贈畀有需要人士。同學們第一堂已經好專心聽李Sir講解木工嘅基礎概念，嚟緊仲會動手實踐，真係好期待見到同學們嘅作品呀!
© 2024 賽馬會樹木再造青年共創計劃 All Rights Reserved.
Web Design By East Technologies
