「升級再造青年木工班」木工基礎班 Class W1 嘅同學特別為香港路德會社會服務處服務嘅長者所製作嘅回收酒箱木製收納盒已經完成啦，仲喺 7月下旬由我哋企劃同事及社福機構代表上門送贈畀長者們。長者們都大讚同學仔嘅手工好好，特別欣賞木盒嘅入榫位。亞珍婆婆仲話: 「好靚啊! 而家見唔到呢啲手工㗎啦，我打算將我嘅首飾放入去。」
我哋企劃每年舉辦嘅「升級再造青年木工班」一直都好受歡迎，直至上年底，曾參與木工班嘅青年學員已經有超過200名。當中2022年嘅畢業生 – Peggy，從事藝術工作嘅佢，喺完成木工基礎同進階班後並無停落嚟，而係繼續跟導師鑽研木工藝，希望可以進一步提升自己嘅木工藝水平。佢仲學以致用，聯同其他畢業生組成團隊，充當木工體驗工作坊導師，教導大小朋友製作簡單嘅木作品，藉以將呢門傳統工藝一直承傳落去！ 小編都係唔講咁多，大家一齊去片聽吓Peggy點講啦!
木工基礎班Class W1同學為牛頭角區街坊福利會製作咗實用嘅入榫木櫈，較早前呢批入榫木櫈已由我哋企劃嘅同事代表捐贈，並將會送贈到有需要嘅街坊手上。
木工基礎班 Class W2 嘅同學為申請 明愛賽馬會「提步向前」電腦捐贈計劃嘅基層人士製作嘅收納木盒完成，並於7月頭嘅時候由我哋企劃嘅同事代表捐贈。所有收納盒都係取材自回收紅酒木箱，既環保又實用，希望收到嘅人士會鍾意啦。
6/7 嘅回收木製弓箭工作坊已經順利完成! 多謝環保爸爸的設計生活 Norman嘅悉心指導，令小朋友可以喺家長嘅協助下，利用回收木，結合其他環保物料去創作出極具個人特色嘅回收木弓箭。當日大家都好盡興，小朋友都急不及待想快啲試吓玩，仲話拎番屋企之後要幫佢哋上色整靚啲啊！
© 2025 賽馬會樹木再造青年共創計劃 All Rights Reserved.
Web Design By East Technologies
