9/3 嘅回收木製風力車工作坊已經順利完成! 多謝環保爸爸的設計生活Norman嘅悉心指導，令小朋友可以喺家長嘅協助下，利用回收木，結合回收紙張去創作出極具個人特色嘅風力車。最後小朋友仲分成兩組，用親手製作嘅風力車即場嚟咗場競速比賽，成個比賽過程好刺激，好難分出勝負啊!
多謝 881903.com 商業電台節目《同途有心人》嘅邀請及分享 本企劃好開心獲節目邀請，可以同大家分享一下我哋喺鼓勵大眾了解本地樹木及推動樹木資源升級再造方面嘅工作。其實我哋每年都會舉辦一系列免費嘅教育及社區活動畀大家參加，等更多人有機會認識升級再造嘅重要性及「人樹共融」社會理念。 錯過咗節目嘅朋友，而家可以收聽節目重溫，對我哋了解更多 : 《馬會致力推動樹木升級再造，全面支援可持續發展計劃》(25/2/2022 第一節) https://campaign.881903.com/hkjc-charities/
中小學校園「願・木」計劃以「升級再造回收木，實踐可持續生活」為主題，將「願・木」Wood Kit材料包免費送給中小學，俾同學們體驗升級再造，為回收木進行二次創作。2024年中小學校園「願・木」計劃即將展開，各位老師想知道同學仔可以將回收木升級再造為咩類型嘅木作品？從中可以學習到啲咩？不如去片聽吓上年嘅參加學校嘅老師及同學點講啦！
上年嘅「樹木再造」年度展於10至12月期間喺賽馬會 – 長春社綠滿林廊及時代廣場舉辦，以「人樹共融」社會理念為主題，令參觀者對樹木升級再造及可持續發展概念有更多嘅認識。另外，我哋亦喺11月舉辦咗「人樹共融・永續社區」專題講座及分享會暨木作品捐贈儀式，除咗有NGO代表嘅分享，仲邀請咗多位嚟自唔同界別嘅演講嘉賓同大家分享如何將樹木融入社區以構建永續社區。即刻去片睇吓當時嘅精彩盛況！
每年嘅「樹遊香港」綠色導賞團都會帶領參加者遊走香港唔同地域，等大家親親大自然嘅同時，亦可以認識本地樹木同綠色資源，探索大自然帶畀我哋嘅珍貴寶藏。 上年我哋就到訪咗鄰近梧桐河畔嘅上水虎地坳村，一個蘊藏著豐富自然生態資源嘅非原居民寮屋村落，想知村內著名景點 「天空之樹」同「花海魚塘」有幾靚? 快啲去片啦！
© 2024 賽馬會樹木再造青年共創計劃 All Rights Reserved.
Web Design By East Technologies
