木工班Class B嘅同學順利「畢業」啦! 經過導師嘅悉心指導，同學仔都已經掌握木工嘅基本技巧，自己動手製作木製品。佢哋仲喺課堂嘅尾聲發揮團隊精神，一齊為百寶箱做上螺絲及打磨等最後工序，合力完成總共12個百寶箱。嚟緊呢12個百寶箱同埋其他同學仔嘅木製品將會送到有需要嘅人士手上，由學習、製作到捐贈，整個過程都好有愛啊!
佢哋喺呢兩個月嘅課程入面分別製作咗魯班鎖、紙巾盒，仲有多功能嘅百寶箱，稍後呢啲盛載住同學愛心嘅木製品將會陸續送出畀Christian Action基督教勵行會、循道衛理中心愛秩序灣綜合青少年服務及香港基督教服務處Hong Kong Christian Service嘅服務使用者！
20/8嘅木製一弦結他工作坊已經順利完成! 多謝環保爸爸的設計生活 Norman 教大家利用回收木床板，結合唔要嘅鐡罐例如月餅罐、曲奇盒，製作出睇得又彈得嘅環保一弦結他。原來除咗結他，仲有好多樂器都可以利用環保物料製作㗎。Norman就同大家分享咗用廢棄水管造嘅牧童笛，仲即席吹奏一曲，大家都覺得好amazing! 最後大家仲即場組成一支環保樂團，用自己親手整嘅一弦吉他嚟個大合奏，一齊彈奏Twinkle Twinkle Little Star，為今次嘅工作坊劃上完美句號~
20/8嘅回收木製迴力船工作坊已經順利完成! 多謝多謝環保爸爸的設計生活 Norman 教大家利用回收木去創作出獨一無二、極具個人特色嘅迴力船，當測試到自己嘅船仔可以成功喺水上行走時，參加者都無比興奮! Norman仲分享咗其他佢設計嘅環保小玩意，參加者仲可以即場試玩雪條棍手槍、回收木製弓箭、紅酒木箱製乒乓球拍等，大家玩得開心之餘，仲了解到點樣將環保同升級再造融入生活當中，真係超級盡興
木工基礎及進階班Class A & D嘅同學為申請明愛賽馬會「提步向前」電腦捐贈計劃Caritas Jockey Club 'One More Lap'嘅基層人士製作嘅百寶箱已經完成。8月頭嘅時候由我哋企劃嘅同事代表捐贈，特別鳴謝明愛電腦工場非常專業嘅車隊同事幫手運送。驟眼睇，百寶箱好似一個普普通通嘅手提公事箱，但其實內有乾坤！ 1) 內有卡槽設計，可放置手提電腦、平板電腦、手機、書本、文具等 2) 收納空間充足，更提供活動式隔板，收納更具彈性 3) 又係多用途工作枱，可化身為手提電腦枱、書枱或餐枱 4) 附設磁吸式LED燈，簡單拆下就可以用USB充電，可調節色溫亮度，仲設有時鐘功能，一應俱全 5) 附有折疊式枱腳，方便收納存放 百寶箱可因應不同嘅住居空間或學童們嘅需要而變身，無論係當枱用定用嚟收納明愛電腦工場嘅再生電腦都絕對無難度！
© 2024 賽馬會樹木再造青年共創計劃 All Rights Reserved.
Web Design By East Technologies
