中小學校園「願・木」計劃以「升級再造回收木，實踐可持續生活」為主題，將「願・木」Wood Kit材料包免費送給中小學，俾同學們體驗升級再造，為回收木進行二次創作。2024年中小學校園「願・木」計劃即將展開，各位老師想知道同學仔可以將回收木升級再造為咩類型嘅木作品？從中可以學習到啲咩？不如去片聽吓上年嘅參加學校嘅老師及同學點講啦！
上年嘅「樹木再造」年度展於10至12月期間喺賽馬會 – 長春社綠滿林廊及時代廣場舉辦，以「人樹共融」社會理念為主題，令參觀者對樹木升級再造及可持續發展概念有更多嘅認識。另外，我哋亦喺11月舉辦咗「人樹共融・永續社區」專題講座及分享會暨木作品捐贈儀式，除咗有NGO代表嘅分享，仲邀請咗多位嚟自唔同界別嘅演講嘉賓同大家分享如何將樹木融入社區以構建永續社區。即刻去片睇吓當時嘅精彩盛況！
每年嘅「樹遊香港」綠色導賞團都會帶領參加者遊走香港唔同地域，等大家親親大自然嘅同時，亦可以認識本地樹木同綠色資源，探索大自然帶畀我哋嘅珍貴寶藏。 上年我哋就到訪咗鄰近梧桐河畔嘅上水虎地坳村，一個蘊藏著豐富自然生態資源嘅非原居民寮屋村落，想知村內著名景點 「天空之樹」同「花海魚塘」有幾靚? 快啲去片啦！
年廿八洗邋遢，大家係唔係都打算新年前嚟一個大掃除，送舊迎新？加上就嚟垃圾徵費，係唔係好想將屋企有好多嘅垃圾揼咗去？等等… 揼之前不妨停一停、諗一諗，有無諗過我哋其實可以將啲唔要嘅嘢升級再造，將佢哋轉化成有趣嘅小玩意？ 就好似我哋輕木工體驗工作坊咁，一眾參加者喺導師「環保爸爸」Norman嘅指導下，利用回收木製作出迴力船、一弦結他、風力車等玩意，既好玩又環保。將環保設計同轉化再造融入日常生活中，原來你我都做得到！
我哋企劃每年舉辦嘅「升級再造青年木工班」都好受歡迎，一眾青年學員都有好多得著。學員除咗加深對傳統木藝同升級再造嘅認識，所製作嘅木製品仲會捐畀本地社福機構，幫助基層人士。 小編都係唔講咁多，大家一齊去片聽吓去年木工班嘅學員點講啦!
© 2025 賽馬會樹木再造青年共創計劃 All Rights Reserved.
Web Design By East Technologies
