木工基礎及進階班Class A & D嘅同學為申請明愛賽馬會「提步向前」電腦捐贈計劃Caritas Jockey Club 'One More Lap'嘅基層人士製作嘅百寶箱已經完成。8月頭嘅時候由我哋企劃嘅同事代表捐贈，特別鳴謝明愛電腦工場非常專業嘅車隊同事幫手運送。驟眼睇，百寶箱好似一個普普通通嘅手提公事箱，但其實內有乾坤！ 1) 內有卡槽設計，可放置手提電腦、平板電腦、手機、書本、文具等 2) 收納空間充足，更提供活動式隔板，收納更具彈性 3) 又係多用途工作枱，可化身為手提電腦枱、書枱或餐枱 4) 附設磁吸式LED燈，簡單拆下就可以用USB充電，可調節色溫亮度，仲設有時鐘功能，一應俱全 5) 附有折疊式枱腳，方便收納存放 百寶箱可因應不同嘅住居空間或學童們嘅需要而變身，無論係當枱用定用嚟收納明愛電腦工場嘅再生電腦都絕對無難度！
木工基礎班Class G嘅同學為循道衛理中心服務嘅社區家庭製作咗簡潔實用嘅木製紙巾盒，7月尾嘅時候由我哋企劃同事代表捐贈。
紙飛機係一個老少咸宜嘅玩意，家長同小朋友一齊玩仲可以增進親子關係！但手折嘅紙飛機總係飛唔遠，所以我哋木工基礎班 Class G 嘅同學為香港路德會社會服務處 HKLSS 服務嘅家庭製作咗木製紙飛機發射器，7月尾嘅時候由我哋企劃同事代表捐贈。大人細路都急不及待想試玩，睇吓邊架紙飛機飛得最高最遠！
英華小學參與咗我哋企劃嘅中小學校園願木計劃，6月份嘅時候視覺藝術科嘅老師將收到嘅「願・木」Wood Kit材料包分派畀小一及小二學生喺視藝堂嘅時候DIY佢哋嘅作品。同學仔雖然人仔細細，但創意無窮，將回收木條升級再造為唔同嘅物品，包括手機座、模型櫈、擺設等等，仲好比心機為作品上埋色添！
大家估唔估到中華基督教基真小學 同學仔嘅作品係咩呢？無錯啦！就係筆筒同涼亭！5月份嘅時候，中華基督教基真小學參加咗我哋企劃嘅中小學校園「願 ‧ 木」計劃，常識科及視覺藝術科嘅老師將「願・木」Wood Kit材料包分派畀小五同學喺課後活動時間創作佢哋嘅木製小品。除咗個人創作，同學仔仲以小組形式共同設計，發揮團隊精神，創意升級！
© 2024 賽馬會樹木再造青年共創計劃 All Rights Reserved.
Web Design By East Technologies
