「樹遊香港」北區綠色導賞團 第四團順利完成！前幾日打風又落大雨，好彩出團日天公作美，最多都係少少過雲雨！今團多咗唔少環保人士同外國人參加，從我哋 IVE Health and Life Sciences (Sha Tin) Tree Management 保育及樹木管理嘅學生生態導賞員 講解嘅樹木導賞中了解樹木嘅特性，一齊分享吓對保育嘅睇法！中午我哋去咗 獅藝館農莊茶座 Lion House Club 食午飯，老闆一如既往咁好熱情同我哋分享餐廳內獅頭裝飾嘅由來！下晝去咗參觀 志記鎅木廠Chi Kee Sawmill & Timber ，畀更多參加者認識傳統工業！
Class A & B嘅同學仔表示：上完2堂Zoom線上直播班，完成咗 #木製陀螺 同 #木製音樂盒 之後，有得去工場實體鎅木既緊張又興奮！有冇燒埋你哋都想join呢？我哋宜家會係 8-9 月加開2班全實體班 Class C & D！完成咗成個「木匠101」，仲會得到證書添！
中小學校園「願・木」計劃嘅第二次學校工作坊順利完成！今次我哋去到沙田蘇浙公學，由 Hong Kong Design Institute Department of Architecture, Interior and Product Design 老師講解點樣運用創意加技巧，將回收木轉化為可再用同美觀嘅物品！ 同學仔都好投入，整咗相片展示架、手機座、燈罩等等！同學仔都偏向鍾意整啲實用嘅物品，希望賦予廢木二次價值！
中小學校園「願・木」計劃嘅第一次學校工作坊順利完成！今次我哋去到伯特利中學，由香港知專設計學院老師講解點樣運用創意加技巧，將回收木轉化為可再用同美觀嘅物品！同學仔都好投入，整咗座枱燈、手機座、火箭、收納盒、教堂等等！相信同學仔透過今次嘅親身參與，一定領略到舊木材升級再造嘅價值同創意設計嘅樂趣！
「樹遊香港」#北區綠色導賞團 第三團順利完成！今團好多家長帶小朋友參加，接觸下大自然！我哋 IVE Health and Life Sciences(Sha Tin) Tree Management 保育及樹木管理嘅學生生態導賞員 準備咗Tree Hunt，小朋友答啱會有豐富嘅小禮物！中午我哋去咗獅藝館農莊茶座 Lion House Club食午飯，老闆好熱情咁同我哋介紹餐廳內嘅獅頭裝飾！天氣咁熱，唔少團友去咗 豆美味豆花園食凍豆腐花，支持香港本地小店！下晝去咗探訪志記鎅木廠Chi Kee Sawmill & Timber，畀更多公眾同家庭了解鎅木廠嘅歷史價值！ 多謝權哥呢三團嘅熱情招待，希望您鍾意我哋送嘅紀念品！小小心意！咁啱仲撞到 TVB東張西望嚟做採訪，主持訪問咗我哋嘅學生生態導賞員，同學仔從專業學科知識分享鎅木廠點樣成為人同樹木之間嘅橋樑！
© 2025 賽馬會樹木再造青年共創計劃 All Rights Reserved.
Web Design By East Technologies
